Easter in Europe Barcelona Day 5 巴塞大教堂，La Rumbla大街

4月5日，呢日我地搭中午機由巴黎到巴塞，機程大約個半鐘，抵達時都係2:30。一落機feel到呢度天熱好好多，因為周圍d人都著晒短袖衫！我地即刻收返晒d褸入喼。

機場都有好多shopping 地方呀！

因為巴塞d酒店相對平d，所以呢幾日我地都住酒店，check in見間房都幾大，唔錯噃！ 因為歐洲訂房都要講明幾多人住，可能我地輸入3個人，所以開埋sofa bed比我地，但我地其實都係3個一齊瞓架，收番張床先。

厕所都好大呀！仲包早餐同埋有evening tea (6-8pm) 有小食同coffee or tea飲，唔錯！

酒店係地鐵站附近，一落樓就係，又係超方便！同巴黎一樣，呢度買T10 就可以搭10程車了。

來之前成日聽人講西班牙治安好差，失業率好高等等。。。但來到見人都無多幾個，應該好難埋手罷！

酒店個員工好好，我地check in時講解晒邊度唔好去，邊度要去。我地第一站就去La Rumbla大街！由酒店Muntaner站去到Placa de Catalunya站（呢個係大站）都係5,6個站就到了。

呢度真係一條大街，有好多遊客，而且天氣怡人，真係好有度假feel! 

經過呢間好多Tapas既餐廳，不過諗住早d食晚飯，所以影下相算了

人頭湧湧，但比香港塞滿自由神仍然係兩回事，仍然好鬆動行得好舒服

沿住La Rumbla大街主要都係賣遊客紀念品，都係賣平野，d 雪糕又幾靚噃

旁邊見到有藝術展又入去睇下

免費睇展覽

又聽人講去到巴塞唔好入d巷仔，因為舊城區呢邊好多巷仔，好易有小偷或搶野後逃走。但係呢日見d巷仔都有好多人行，好似幾安全咁

我地後面就係Palace Guell奎爾皇宮，我地見到人龍先知原來係景點，估唔到人龍長幾條街！！！真係好多人排隊呀

網上做過research，都話受歡迎既餐廳晚飯時段會排長龍。又話西班牙d餐廳晚市係8點-11點，咁晏妹妮頂唔住噃，佢平時8:30就上床架。於是我地就試下5:30 食個早飯。

好彩餐廳無落場關門，而且仲要等位

等左一陣終於有位了！

雖然未夠6點，但係都坐滿人呀

今日搭飛機其實都無正式食過lunch呀，係時候要食下野了！！到西班牙點可缺小Sangria同Paella呢？？妹妮叫我同爸B cheers，呢幅相佢設計架，又幾好噃！

呢度興飲Nestea檸檬茶，就叫比妹妮啦，但係影到好似飲緊酒咁，哈哈！！

頭盤係combo，有魷魚圈，蛋角，薯波，而個炒魷魚就最好味！！

西班牙海鮮飯都好味呀！有青口，有小龍蝦，有香腸，飯有小小煙靭，唔錯！

爸B又做扒皇，佢話牛扒都OK！好彩我地早到咋，因為6:30 已經見到門外有長人龍排隊了

食飽飽，行多一陣，其實沿住La Rumbla大街行到尾就可以去到海灘，不過4月仲未有好多人去海灘，相信夏天會見到好多人好熱閙既海灘。我地就順便去埋附近既大教堂 Barcelona Cathedral。

行行下入左個廣場，周圍好多露天餐廳

我地見行去大教堂條路係小路都好多人，所以都唔怕跟住行了。

行行下聽到有人唱Opera，我地又坐低聽下，點知我地隔離個男仔原來就係唱家！！

突然開腔我地真係好suprise~! 咁後生又唱得唔錯！佢咁casual，好似客寸咁，感覺好似求其一個鬼佬都可以唱得好咁！我地都有比＄去個兜兜。呢日真係覺得巴塞好特別呀！

去到大教堂了！呢度d建築好似比法國精細同細緻

因為我地無信教，所以去到教堂都係欣賞建築物既角度去睇，可能教友會有更多感受呱

呢幢大廈幅牆好得意呀！下面係間好似log-on咁賣得意野既鋪頭，呢日我地打算早d返屋企，其實講緊8點幾，但係個天仲好光猛，真係好正！

行返去Placa de Catalunya站好快就返到了！