bb變公主

妹妮都3Y4M了, 繼新年前幫妹妮掉左張high chair換張有手抦的大人椅後, 連攔住厨房度閘都拆埋, 等妹妮做個大個女.

至於張bb床, 都瞓左3年零4個月, 一早係時候退役了, 不過我地個張零捨大, 於是懶懶閒又用左咁耐都無換. 呢張相係妹妮都未出世時爸b砍床時影架.

最係, 我地終於的起心肝幫妹妮換床, 做個真正大個女.  我地做左個好驚嚇既決定...新年前已經落單, 但係等左成個月, 啱啱星期六(3月5日)先送到黎. 咩咁巴弊呀?! (其實因為要批草圖同埋農曆年先阻左咁耐啫)

咪就係...登登登戥...公主床囉!! 係, 係我地自己中個頭埋去, 一相情愿諗妹妮會鐘意公主既.  其實我一向好抗拒公主架, 好驚個隻粉紅色, 但係妹妮而家的確好鐘意公主架, 比如話佢知食完某d食物會變白雪公主, 佢會即刻食囉...好彩未至於沉迷. 加上我地去睇傢俬時親眼見到幾個7, 8歲既女仔係鋪頭入面猛同媽咪講 : 好靚呀, 好靚呀! 我地諗呢個pattern應該玩到幾年呱...於是就落搭了.

妹妮知道有公主床果然好happy, 仲不時昅住d工人裝砍, 做個小管工.

 其實效果都ok, 唔係真係好嚇人啫...仲幾靚吖! 講真d畫功真係唔錯, d公主畫得好靚, 話晒有迪士尼license, 真係畫得似正版, 一d都唔似老翻.

有公主圖案既地方唔係好多, 係床頭同櫃門. 主要都係碎花, 我諗妹妮大個d都未會厭棄呱? 加上上面個公主紗可以拆走變成普通子母床, 有兩個look都幾好吖!

妹妮二話不說去試床, 真係好鐘意好開心呀! 我地問佢新床好唔好瞓, 佢又識話 : 都幾好既

第一晚瞓上床幫佢影相, 即時扮野王上身!!

不過瞓覺卻可能因為新床太'空曠', 唔似以前張bb床有床欄疏隙可以裝到yaya, 所以瞓唔著, 又要yayagigi陪佢一齊瞓 (其實yaya而家瞓下格距離仲近左架), yaya話唔得, 要佢自己習慣, 佢又偷偷飲泣...仲喊濕兩條手巾仔呀陰功! 後來典到成點先瞓著呀.

好彩第二晚已經可以適應到, 一覺瞓到天光! 只係半夜會叫一聲yaya, 等yayagigi應佢'係度', 佢就安心再瞓. 第朝一早仲好驕傲咁同我地講佢好乖, 無醒過. 落到樓下等校車時仲話比d小朋友知佢有公主床潻 =__=" 我諗我地今次無買錯吧!