點解咁熱仲戴晒手套呀? 話說之前去日本旅行時, 有日行行下街妹妮話 : mami, i do ice skating, you see...初初以為佢會跣下跣下, 然後即刻當街當行遞高隻腳, 從側面睇做左個經典溜冰動作 'T'字. 真係好搞笑. 之後當晚番到酒店電視又播花式溜冰比賽, 妹妮一邊睇一邊話想學溜冰.
叮! (一言驚醒) 係噃, 我地可以帶妹妮去玩下溜冰噃! 於是上星期日去試下先. 妹妮知道有得去溜冰不知幾興奮, 本來啱啱瞓醒晏覺唔願郁都即刻跳落床去著鞋
第一次去溜冰, 唔知有無d咁細既鞋呢? 去到先見到有好多小朋友都去玩架! 妹妮腳仲細, 個表都未有佢size就著27號鞋, 我平時著37號, 冰鞋就比39號我
好緊張呀 (妹妮話)
豬腳著冰鞋
仲擔心妹妮著鞋後企唔到潻, 點知佢好快適應到, 叻!!
好嘞, 爸b話幫我地影相所以無玩, 得我揍住妹妮. 仲要我都十幾年無踩冰, 一踏上冰場已經好跣, 自己都要小小時間先企得穩, 加埋逗住妹妮, 佢又昂前又仰後...搞到我成身汗呀!
慢慢跣到埋一邊, 比妹妮扶住側邊行. 其實對鞋咁重又咁難行, 仲擔心佢會厭惡左溜冰. 出奇地佢無覺得驚又或然者辛苦噃.
一路行我都一路講, 跌到都唔駛驚架, 好多人都跌架, 等佢唔好expect咁高. 每兜一個圈我地就入去唞一唞...主要係我勁攰呀! 逗住妹妮行真係用晒所有氣力
又再黎過...不過發覺咁逗住佢唔係路, 叫佢試下好似行路咁提起腳左一步右一步, left right left right, 佢又叫極都唔聽
因為佢覺得跣跣下好好玩呀
後來好小小, 唔駛逗住都可以平排拖住行, 開始肯試下left right left 行喇. 不過佢一唔留心前後中時, 我一隻手拖住佢一隻手, 圍住我打左個圈, 仲話自己啱啱spinning!! -__-" 想再spin過
跟住排隊等左半個鐘既企鵝有得租喇!! 好野, 唔駛我喇, 可以興鬆番晒
妹妮自己揸住企鵝起碼唔會向後仰嗎
仲巴弊到叫我自己去玩啦, 佢自己ok架喇, 真係當自己好叻咁呀
不過都可以行到, 似模似樣既
好似話香港得呢個冰場有企鵝出租咋
早知原來有d即場walk in 班, 就比妹妮試下啦, 有人教唔駛我逗得佢咁辛苦吖嘛.
隻企鵝玩左廿分鐘度妹妮開始叫攰, 我地最後玩左57分鐘埋單, 每人$57, 一蚊一分鐘, 都唔算貴呀, 今次妹妮印象良好, 猛話好好玩, 一d都無驚又無覺得辛苦. 咁我地得閒又可以帶佢黎玩過!
No comments:
Post a Comment