生病了

今個星期開始單獨返學，返了３日學，星期三爸Ｂ終於忍唔住跟車同妹妮去返學。因為老師在開學初期誤會妹妮最大個又喊得最多，雖然yayaGigi已話過老師知妹妮在班中雖然最大隻但年紀最細，爸Ｂ仍然想替妹妮平反，並叫老師多Ｄ照顧她。爸Ｂ話同老師傾完後，妹妮可能知道爸Ｂ要離開，妹妮突然別個臉走埋張枱度，爸Ｂ仲以為妹妮咁寸唔啋佢走去玩，點知原來妹妮走埋去枱係去攞紙巾，另番轉頭已經開始扁扁咀印眼淚。唉，聽到都覺得個畫面好陰功呀。

放工買個天使蛋糕tum下妹妮開心啦。

點知夜晚妹妮就病倒了，星期三晚妹妮開始發燒，又突然嘔一餐。對上一次發燒係舊年年初一呀，我地初一流流走去醫院睇醫生呢。妹妮好怕嘔，可能怕污漕，又或者好辛苦，每次嘔親都大喊。發燒可能好口乾，又自動會不停飲水。除左發燒，嘔，仲流鼻水，咳，數得出的傷風感冒病徵都齊晒。

星期四一早去睇醫生，妹妮因為發燒個臉豬仔紅卜卜，不過無胃口臉仔又再尖了。

雖然成要玩醫生遊戲幫我用聽筒聽心口，就算話佢去睇醫生都好似好開心咁話see doctor。不過次次一見醫生個樣就會喊，所以今次我睇先，等妹妮睇住醫生點幫咪me睇病，到佢時無咁驚。果然work喎！

妹妮見到醫生用聽筒聽咪me，其實都無咁驚，不過坐到埋去仍然扁扁咀。。。不過咁全程都無喊過的！醫生先摸下佢頸仔，又按下肚仔，仲捉住妹妮隻手仔等佢自己按番自己個肚，之後睇喉龍，耳仔，好叻女呢！

下晝又發過燒，一發燒就成頭大汗。

星期六，仍然係on and off 咁燒，不過我地仍然一早出門食早餐，見妹妮精神一Ｄ，yayaGigi幫妹妮扎個芭蕾舞頭...好似人地去跳舞一樣，妹妮呢個髪型都幾靚女吖！！

係咪似模似樣

好似跳‘吧呢’Ｄ女仔呢？唔知幾日有機會比妹妮學下‘吧呢’呢？

嗲Ｄ，快Ｄ比我學啦！！

自己都覺得自己靚女，忍唔住要照照鏡。

食早餐時見到phone哥哥，可能好耐無見，但唔知點解用咁凌勵既眼神掘住人？

食左幾日藥都無點好轉，仍然on and off的發燒，星期日放假就成家一齊去睇醫生去。今次成家一齊去醫院睇，之前妹妮睇過呢個兒科，不過可能因為方便又或且我地Ｄ感冒係小兒科，爸Ｂ同我都被安排一齊睇。咁我地又比醫生睇先，等妹妮relax D。

點知埋到位又開始眼濕濕，不過無大叫大喊都係進步了

之後猛話要飲milk milk，便買了低糖維他奶比佢試飲，都係飲得小半盒。

三個人三包藥，妹妮足有５樽藥水！好彩全部都算‘好味’，飲落都無掙扎。

臉豬仔仍然紅卜卜

不過已經活潑好多，生猛番晒！快Ｄ好番啦。