太空館 ＋ 寄給自己的信

3月4日，星期日爸B一早諗左今日節目比妹妮喇！其實我地一個星期得一日可以同妹妮去街（星期一至六都要返學，學野），所以都盡量唔係剩係去商場行咁無聊。去下公園，博物館，踩下單車，好似健康D。一早去食個早餐！今朝妹妮扭計想去食茶餐廳既‘花花腸仔’ （其實係𠝹開條腸仔令佢熟左後成朵花一樣）。但係因為唔順路，於是我地去左另一間，妹妮直程喊晒。不過經一輪解釋，話有D鋪頭星期日會關門架，人地都要放假架嘛（雖然係呃佢）但係最後妹妮都相信左，媽me應承星期一再帶佢去食，妹妮條氣即刻順晒！！



都係去尖沙咀



再經過文化中心



今次真係去太空館喇！！其實對上一次去已經係前年十月二日了，當日都係諗住去睇天象廳，但係太多人排隊，爸B索性同妹妮講賣飛個電腦壞左，無得入去。自此妹妮就記得space museum computer break down (當時妹妮仲係兩歲幾，仲係講英文架）。我地係咪好衰呢？成日呃妹妮，佢好慘呀。今次買到飛，有天象廳電影睇呀，妹妮幾開心！



自己拎張飛埋去比帶位員潻



入到天象廳喇，我自己都N年無黎過！我諗自中學畢業後都無去過太空館了， 記得以前太空館有好多野睇架，有模擬星球，仲有係每個星球唔同質量既重量，而家好似都無晒了。當坐定定，天象廳開始播放電影時，可能係個銀幕圓拱頂關係，當成個銀幕都黑晒又有星星出現時，妹妮以為我地上左太空呀。不過套戲既題材可能太深，中途爸B瞓著左，妹妮就話想返番地球喎。 



今次睇果套電影叫隼鳥號，係講一個小行星探側器，幾經辛苦去到一個叫覓川（itokawa) 既小行星，採集樣本返地球，等我地可以研究太陽當初形成既狀況。而個覓川就好似一隻遊輪既size。


睇完之後，妹妮最大理解係 'the earth is so big, but the little rock just small like a ship' 。佢又好似唔覺得悶咁噃，不過我都有D hub眼瞓。


呢日天氣又涼番，我地都係經文化中心行返去海港地好D， 見到有櫈個懶豬又坐下先！



同爸B玩捉依人，當然唔名爸B走得快啦



嘩！玩雜耍？？



好似好勁噃



古靈精怪妹



見到雪糕車呀，妹妮就未認得雪糕車，唔知見到呢架車就有雪糕，哈哈！淨係掛住擺甫士比我影相



連食緊雪糕都係咁，掛住甫士



記得前年夏天去北海道旅行，食呢D雪糕食到溶晒滴晒，叫極佢都唔識lam左D雪糕。而家終於識喇，不過都要媽me傍住叫佢轉方向至得



行行下又扮溜冰，好彩無人係後面咋，唔係比佢踢死都似！



呢條友仔一路行都整蠱做怪，動作表情多多，頂佢唔順！



跟住去左金牛苑食晏，妹妮第一次食呢間，我地叫左扎肉湯粉比佢，點知扎肉有黑椒，唯有食下粉同炸蝦丸



仲食埋春卷潻



呢日另一個‘節目’，就係寄信比自己嘞。等佢試下寄信，寫信同收信， 一舉3得呀！



爸B寫稿，妹妮照抄



因為有D字學校都未教，所以淨係抄就真係核突左D，個‘學業進步’都係抄架咋，不過妹妮寫完都有問係點解



擺埋入信封就掂晒！



食飽飽回家途中就去寄埋信



今次係妹妮第一次寄信呀！



第朝星期一，妹妮一早有學返架，我應承左佢今日去食花花腸仔，所以返學前就去左食早餐了！



嗱，呢D就叫花花腸仔嘞，妹妮食飽後我同佢講：嗱媽me應承過你真係會做架！ 妹妮話：不過爸B應承左都有時唔記得架。
（咩呀？） 妹妮話：爸B又話星期六寄信都無寄既
（咁尋日寄左囉，下次你要提下我地架，有時真係唔記得架嘛。）

第二日就收到信了！！真係快過打針 （個信封係recycle信封黎架，所以畫到花晒 ：P）



妹妮見到自己封信好開心呀！！ 真係一個又平又好玩既實驗呀。爸B放工買左五代同糖燉蛋呀，正！



妹妮食到lam lam 脷呀！