媽me去飲

今次好似係第一次同妹妮一齊著呢件褸出街呀！其實妹妮都好鐘意同媽me著埋一樣既衫架，佢仲話我地係twins，佢係大家姐我係細家姐潻！



我地又去食花花腸仔呀，不過去之前妹妮好好記性，記得上星期講過星期日間餐廳唔開。聽到我地話去花花腸仔果度，佢就已經話番比我地知‘今日唔開架！’。我地唯有話今日去撞吓囉，可能開呢？ 另一個去呢度食既原因都係個餐抵食夾大件！ 比平日茶餐廳多野食又平D。



開正妹妮果辨，佢食到好多架，半碗米線，腸仔，蛋，火腿，爸B個餐既吉列豬扒。佢話食完個肚腩仔變左big tummy喎。



最近兩個星期一連去左兩個飲，其實舊年一單都無，今年就陸續有黎！第一單去Ritz Carlton，因為朋友個婚禮都幾大型，因朋友Wendy都夾左著靚D！



場地個佈置都好靚，好清雅，主要係綠色同白色，呢件白色裙襯晒呀！可惜我換衫時妹妮去左嫲嫲度，見唔到條裙，Yaya幫我拉拉鍊時都話Aerin見到一定會好鐘意呀。。。因為佢最近成日where 開件衫領，問佢做咩唧？佢話想扮公主喎！我地話公主唔會where開衫領架，點知佢指住公主床上D圖畫話：你睇，公主係咁架！（原來公主都係著露肩裝架！）我地都即時諗唔到點答 所以呢件露肩既實啱佢！

當然仲有兩足貪靚既朋友，約埋一齊著靚D！你知啦，香港人其實好小dress up架，好多時去飲都會著牛仔褲，難得呢個場合可以著靚D，幾大摷晒D倉底貨出黎著啦！

個宴會廳到好grand好靚架！



新娘新郎上台講話



個門口都好靚，好彩Wendy 有帶相機可以影下相，唔係真係嘥晒D靚景



其中一道菜，係鮑魚鑲響螺，總括食物都幾好味架



新娘對孖仔姪仔上台跳舞，整晚氣紛都好開心架！！



無玩新郎新娘環節，但係好多朋友親人上台獻唱同表演，雖然好業餘，但係好溫韾架！



終於有機會捉住對新人影相，中間個妹妹係姪女黎架。



一星期後去另一場，今次去黃金海岸遊艇會。本來無打算著fur架，點知當日氣溫突降，得番12度。



嘩，今日新娘D金多到雙手都戴唔晒！



要掛埋頸



哈，呢條係前年Lanvin X H&M 裙黎架，今次第一次著，其實都唔算好隆重啫！



我地都有成班friend去飲架！好多時去飲都係識得兩三個朋友一齊去，成枱人都唔識，遇著好似今次咁自己友都有一枱真係開心好多架！！



祝兩對新人都白頭到老，永結同心！！