學校玩水日

呢排妹妮好鐘意被我揹，每次唔肯去刷牙，沖涼等，都係一話揹佢就即係肯爬上我背脊，好似騎馬咁揹佢出黎就最開心。

睇住自己個video，居然指住問who is that?

托晒頭睇得幾入神？

星期五學校有個water activity day，仲叫埋家長一齊玩。等我嗰日專登騰出時間走去陪妹妮玩，雖然遲左十分鐘到，一去到老師啱啱同妹妮玩緊。

嘩，玩到成隻濕水鷄一樣

原來幫公仔沖涼呀！成班細路走埋黎，不過都係各有各玩，無咩交流。

玩完一陣水，就同家長一齊玩Ｄ接力遊戲，將一杯杯水由Ａ點拎去Ｂ點。

跟住又分隊玩‘娟’山窿

要娟過晒家長既褲襠。。。真係要娟人褲襠好唔老黎，不過大家一齊玩就無所謂啦。

一齊影相，妹妮次次都笑得咁勉強。

跟住仲有得掟水蛋！雖然玩得一個鐘，不過有得玩水真係好開心，妹妮更加係樂而忘返。

就睇下妹妮點幫公仔沖涼，雖然手勢麻麻，不過都有板有眼。應該都係學yayaGigi平時點幫佢沖，又識𢳂下水臨頭過水，算係咁啦！

仲有之前成日睇Barney，學人一邊唱歌一邊扭來扭去，最弊係唱唱下會食帶，咪就係唔記得歌詞囉。