同yayaGigi家姐有約會

今日有個臨時加插的特備節目，就係同yayaGigi家姐一家人去飲茶。可能有人會覺得我地騎呢，連工人既家人都應酬。話說yayaGigi個家姐一家人來港工幹旅遊，yayaGigi問可唔可以帶妹妮同佢家人去麥當勞食早餐，因為佢家人成日係youtube睇妹妮D video，好鐘意妹妮咁話。我只係諗橫掂我地都會例牌去食早餐，不如一齊食囉，既然佢地係遊客，不如去飲茶，試下香港美食囉。

加上yayaGigi個家姐每年黎香港都會帶Ｄ手信食品比我地屋企，今次就帶左兩盒雪糕，同Ｄ小食。咁成日食人Ｄ野，雖然唔係話Ｄ咩貴野，禮貌上就請佢地飲番餐茶囉。

原來一行人仲有yayaGigi家姐（左邊綠衫），老公同兩個女，仲有個７歲大孫同老公個妹。

佢地都好友善，而且可能係做生意的，成日會飛去美國傾生意，所以好文明，一Ｄ都唔似係落後國家黎（恕我見識小，心目中既菲國係落落地後架）。不過佢地話馬尼拉而家都發展得好好。

佢地話呢個孫Jaycee見到妹妮亦變得多野講，成日撩妹妮傾偈。

雖然無咩特別話題，不過都唔算悶，可能都以妹妮做話題，佢又唱歌又扮野，成為主角。

開頭妹妮都有Ｄ怕醜唔敢講野，後來熟小小都拉左yayaGigi姨甥去睇魚魚

好快就熟絡左了

唔知點解Ｄ魚有咩咁好睇？

　無幾耐妹妮同jaycee就friend過打band，拖住手走來走去

返埋位後仲各人輪流同妹妮影相，妹妮好似名人一樣。

飲左個零鐘茶就散band，妹妮啱啱先同jaycee孖公仔，就要bye bye 了。佢地即日下午就飛走，仲叫我地下次去菲律賓玩，可以再出黎食飯。

下晝yayaGigi話已經同家姐通過電話，佢家姐話我地應該係香港最好既僱主喎。硬係啦，我諗佢地都聽唔小菲傭被虐既新聞。除左覺得我地好nice之外，仲因為yayaGigi只係個helper，我地都咁比面出黎飲茶咁話。講真我又無當菲傭係低我地一等，大家都係平等，只不過我地出糧比佢幫我做野啫，唔係奴隸嘛。下次如果佢地再黎，我地歡迎再一齊飲個茶，食個包架。