東京箱根之旅2012 ﹣ Day 1 東京我來也！

雖然好多人都話日本有輻射，但係我地最終都以身試法，去左東京旅行。之前都有諗過轉去大阪或其他地方，但係最後都係去番東京。。。而家去東京D package已經變番正價，所以唔係貪平至去，但係始終覺得佢最好（玩）。妹妮仲有印象舊年都去過日本架，今次佢都好期待架。每次旅行都霸住呢個黑色篋話係佢既私家篋，仲自己拖潻。

1月28日（年初六）出發了！



6點半就去到機場上8點機



個天好靚呀。期待去旅行好耐了，眨下眼就出發



妹妮成個大人一樣仲繞晒腳瞓



一落機，佢見無雪，佢即刻話：呢度都唔係日本！都無雪既！！ 我話唔係成日都落雪架嘛，唔通夏天都有雪咩。點知佢話：咁而家冬天吖嘛！唯有tum佢過兩日去箱根有雪架，我地舊年去都落晒雪既



2點幾終於到車站了，我地搭Narita Express。點解有個大陸妹踎左係度架？



原來佢想避開爸B架相機！



上到車了，預計3點半左右會出到城區，足足travel左大半日！！6點鐘出門去到已經3點半



久遺了的新宿，市面一切如常，就好似我地每年都黎探佢一次，以前的新宿一樣，一D都無變。



去到酒店了，妹妮見到個假火爐猛問係真火定係假火，然後大叫：假架！！成個lobby都聽到晒 ﹣＿﹣”



上房了，明明係twin room，點解D床咁窄既？舊年我地住sunroute plaza都係兩張大床，不過果間無呢間咁方便，爸B最鐘意呢間樓下近歌舞妓町，夜晚可以食宵夜吖嘛！所以逼小小親密D囉。



整頓一下就落樓下食小小野先，最就腳有壽司，我地都唔怕去食左。妹妮鐘意食甜蛋



下午茶時間真係無咩人食壽司，不過求其一碟都好好味呀。不過因為輻射關係我地只打算食一次魚生，雖然要有輻射就食咩都有，一次都死，不過既然黎得都唔好諗咁多了。



另一飛佛係就係bubble了。。。三文魚子！入口即爆既感覺佢最鐘意



食飽飽我地去行街街了，第一晚都係打算留係新宿遊盪下算了



漫步新宿街頭




第一站唔係睇女裝係去睇童裝！梗係去探香蕉池啦，一手擸左幾隻了



直程當自己屋企一樣，幾free!! 任碌唔嬲




玩完狼人玩奶咀B，摷到人地D衫亂晒！



妹妮將所有上排同下排D衫全部推到入晒牆！好彩有幫襯加上日本人好有禮貌，都無閙咋！



Anna Sui D衫都好靚架，直程同大人衫一樣！價錢都好嗱脷，右邊年紫色褸減左價都成兩萬幾円



本來今晚想食燒肉，但係爸B話無咩胃口，去食過拉麵算了，我地又去每次去東京必食既天神拉麵，真係好好食架！



最鐘意係可以自己再加蒜蓉，D豬骨湯都好好飲，我地食親都會得番個吉碗，湯都飲埋架！



個阿姨仲比張特高既櫈妹妮坐等佢睇到個廚房潻




食飽後仲去埋comme ca kids 睇下有無平野執，妹妮仲有糖食潻！



第一晚就係咁多先，週車勞頓左成大半日係時候要返酒店唞唞了



今次最大進步係我地無帶奶粉黎，妹妮開始飲小左奶了，平時多數一日一杯，去旅行就飲小幾日啦，我地買左士多啤梨奶，點知原來係酸奶黎架！