東京箱根之旅2012 ﹣ Day 3 向箱根小田原出發

1月30日 

一早起身，妹妮就攬實隻barney，都唔知做咩佢突然又咁鐘意隻Barney，半夜扎醒都要搵佢架！ 仲話尋日買隻貓巴士係買比Barney既潻，波兒就買比媽me既。



佢問仲有其他公仔呢（佢本來擸左4隻），爸B話：你瞓緊覺時自己送左比其他姐姐嘛，唔記得咩？（瞓緊覺又點送到野比人呢？）妹妮話係咩？唔記得了，但又無扭計話要番D公仔，搞笑！



今早去食松屋，爸B食佢最愛既牛肉飯定食，仲有沙律同溫泉蛋！留意下爸B隔離個人，懷疑佢係飲醉左呀，一直係度瞓覺無郁過



我就揀左麻婆豆腐，日式麻婆豆腐其實都幾好味架！呢碗都唔錯



但係豆腐小小辣，所以妹妮都係食番牛肉飯啦



我鐘意呢D有D movement既相架，但係想叫爸B幫我影。。。就難！



佢唔會識同你一邊行一邊影架



只會係正面影 U_U , 妹妮呢埋係因為個太陽太晒噃，所以要呢係我件褸入面囉



今朝係我地留係東京最後一日了，我地10：00就check out左，攞在行李係酒店後出去最後衝刺，行下食下


可惜好多鋪頭都起碼11：00至開，我地都係噝條街盪下，買罐熱朱古力飲下先



去左商場行左一陣，妹妮已經話好攰要唞下，於是我地又影下相。點知係後面果個仲搶鏡過前面果個



妹妮成日發白日夢，呢日就被爸B同媽me整蠱了，佢一邊發白日夢一邊行，又唔拖住我地。行行下我地呢埋左佢都唔知，仲一路向前行！ 我地離遠監察住佢，見佢行到好遠時就伸手拉住附近一個著杏色褸既女人件褸，人地梗係fing開佢啦，佢先開始知自己走失左，於是就大喊daddy mami!! 你話呢D白日夢王係咪要嚇下佢先知驚？ 我地出現番時佢話好驚唔見左daddy mami喎



捉返佢我地又去食晏喇，其實都未係好肚餓咋，不過又想食埋和幸先走，呢間都係我地每次會幫襯架。



坐到入餐廳相信佢都未驚完，仲咀扁扁咁



D豬扒又真係整得幾好食噃


食完飯心情好番晒了！佢話呢個係個 ‘女’ 字噃



好了，準備出發去箱根，行去攞車之際無啦啦擺個甫士，想點呢？



又係toyota



開車返酒店拎埋D行李就同東京bye bye了，希望好快會再黎啦



沿途妹妮都瞓到口擘擘， 舊年一樣由東京去箱根，行到一半已開始落雪了，今年一滴雪都無呀！可能今年間酒店係平地，上次係山啦，所以上次果度落雪啦



去到酒店，我地drop低行李後就出去觀光了



原來溫泉酒店好近湯本箱根站架，



站附近都好多小店，於是逛下先啦



大部份都賣係海產，手信等

妹妮因為啱啱仲係車瞓緊，要的佢出黎，所以比架B車佢坐啦。爸B走左去買咖啡，架車擘左係度都無人會理架。

湯本箱根站兩旁的小店

一路黎箱根既hi﹣way同舊年果條唔同，因為今次住位置唔係山上面。沿途見有指示牌寫住’小田原‘，應該好近既。我記得N年前同公公來日本過新年，都有去熱海浸溫泉，當年仲步兵搭火車，係小田原站轉車架。所以記憶中都有D野行下，起碼大過呢個得兩排鋪頭既湯本箱根先。點知一路行，都未到小田原站就見到小田原城，於是落車影下相先啦

個甫士係咪好神氣呢？

呢度唔算好大，不過都有護城河呀

入面好簡單，不過仲好新淨

又身痕要起飛！

今次最好係呢張！！

嗱嗱，呢張我影架，我自己好滿意呀，影得佢地幾自然！！

妹妮唔知點解猛踢地上的小石

呢個影雖然未至於話好靚，不過影相做背影又真係唔錯噃

5點幾已經開始天黑了，仲有幾滴雨點，係時候走人

妹妮好鐘意我同佢一齊一步一步彈下彈下咁行路，平時係香港都有時會同佢彈下，佢就會開心到卡卡聲大笑！有一次去學琴我地又彈（當然係有其他人既地方媽me無彈得咁高啦！）點知有個管理員望住我地，妹妮即刻覺得鑑尬即刻停左唔跳，話個叔叔覺得我地好silly喎

因為有雨點，加上book左7點開餐，我地返酒店休息下先。回程時，可能酒店比平路高小小，開始上山，雨點開始變成飄雪呀！！唔知聽朝會唔會有積雪呢？

妹妮話見到我個名，但係佢以為隔離個名係爸B既

求先check in都無入過間房，剩係drop 低行李，而家入房了，間房個廳同上次差唔多，但係外面就多左個廳，對住條河同溫泉

嗱嗱聲浸下溫泉再去食飯

私人風呂好在可以3人一齊浸，唔駛用阿公果D要男女分開，又可以影相

今日最後節目就係去大廳食晚飯了，其實住溫泉酒店係應該他他條條咁relax下既

晚餐唔算好大份量，但係食晒都幾飽架

除左豚肉鍋，壽司船，同小食，仲有其他食食下就送過黎，所以都夠食既

食飽飽返房睇下電視，準備瞓覺豬。由於洗面同shower都係客廳外既外廳，去擦牙時好凍架！！果個廳無暖氣，直程同街既氣溫一樣咁凍呀

鋪好他他mi，覺豬豬了！

Good night!!