無所事事的新年假期

今年比較平靜，加上天氣又凍又落雨，其實初二開始我地已經無特備節目了。初二都係重覆初一既節目，去嫲嫲同公公屋企食開年飯，不過次序就同尋晚相反，今朝去左嫲嫲果邊先。樓下商場都好有心機佈置噃，影下相先上去，我地真係好少影全家幅架



通常都係得我揸機或且爸B揸機多

妹妮今日話要學yaya一樣扎條馬尾喎，但係D頭髮又短，扎起都仲跌晒出黎。一路拖住佢行，妹妮話今日同媽me一樣著 ‘高踭鞋’ 喎 其實因為妹妮貪靚得滯成日要揀衫著，爸B最近已下令妹妮唔準自己再揀衫，要由媽me或yaya揀咩著咩。今朝妹妮見到呢條佢好鐘意既花裙，開心到要多謝媽me呀。

上到去嫲嫲度先知原來無飯食，大家番落樓下開餐，度度都排晒隊等位，要姑丈去霸位先有得食

去左食拉麵，不過唔係好好食咋



食完又返去嫲嫲屋企，無無聊聊寫下字，今日先學寫“嫲嫲“同個”家“字架。

叫極佢瞓晏覺佢都話唔眼瞓，點知上車無耐就hub著 u_u" 仲瞓到吖晒口

一早訂左美心中菜訂左開年盤菜，話明有鮑魚，瑤柱，蠔豉，雞，鴨，髮菜，燒肉，豬脷，蓮藕，魚卷等等，總之聽落D料十足，所以都幾期待架！攞到之後個賣相都唔錯，呢張相就加多左幾塊公公拜完神既燒肉同豬脷，其他都係個盤既餸。

到我地影合照喇

食飽飽返聖企喇，妹妮臉豬紅卜卜加埋頂帽成個愛斯基摩人咁呀

初三我地去探下太婆，雖然太婆瞓著左，但係妹妮照唱新年歌。妹妮突然爆一句：太婆唔認得你架！ （邊個話佢知既呢？）



而家D細路真係好醒架，今朝一早同妹妮漫浴，佢問點解我坐埋落浴缸後D水會高D既？然後自己答：因為媽me你重呀，所以坐落黎D水會高D架。（邊個話你知架，咁叻既？）佢話：無人講架，我自己諗架，我見過好多次媽me坐落黎D水都高左架，咪係你重D囉。（咁係坐落黎D水會唔會高D呀？）妹妮話：唔會！我輕吖嘛！ 
咩而家D細路好似咁醒咁既，就算唔係佢自己諗係有人講佢知，我諗自己細個時起碼一年班先識呢D野呀

呢幅都係妹妮幫我揸機架，影得都幾好噃！！

呢日我地無節目呀，今日又落雨，出街濕立立都唔願郁了。本來約好朋友飲茶，不過朋友們唔得閒我地去左食快餐。

妹妮返到屋企瞓左一陣，表弟就到訪了，有人陪妹妮煮餸了。

大人就整牛油曲奇，之前同妹妮一齊整過架，不過今次效果無上次咁好食呀，今次太鬆，好散呀

兩個玩完煮飯仔玩大肥，夾份幫大肥按摩

二人四手按摩，大肥就真係嘆！因為佢最鐘意就係被人摸

妹妮話大肥唔識派利是，因為佢係貓黎架，然後自己哈哈大笑

一年一度既新年假期，無所事事咁就完了。