K2 outing @ Ocean Park Academy

3月2日（星期五）妹妮期待左呢日成個星期喇！因為學校K2班全體去旅行，仲要去海洋公園噃！唔知之前一晚妹妮有無好似我地細個時諗住聽日旅行瞓唔著呢？不過佢好似上床後都好快瞓著，或者未識諗呱。



一入到班房，就見到好多小朋友的作品，貼滿壁佈板架！



仲有好多當旗咁掠衫一樣夾晒係繩上面

妹妮好習慣呢間學校既生活，一入班房識自動走位擺野

妹妮首先埋去呢個畫畫corner，個個自動擔張櫈仔埋去架，叫D同學仔望鏡頭，就大家一齊拎過黎，可惜我今日個鏡頭淺景深，係對住左妹妮，搞到後面既小朋友矇晒。影左幾次較晒auto mode都係咁，真係對唔住D同學仔喇。

大家一齊好專心咁畫噃



老師叫集合了，同學仔返番自己個位。妹妮之前坐第三排最後果張枱架。今個學期掉左上最前呢張枱，睇佢幾專心聽老師講野，唔知平時上堂有無咁專心呢？



大家聽好今日流程後就排隊等上巴士，就咁睇妹妮好似大隻過D同學好多咁呀！



返到學校時，見到有D同學仔妹妮都會嗌佢地架，但係就無同任何人糖黐豆咁。有D同學一見到另一個就黐埋架喇，好似下面呢兩個好似好friend咁一定要拖住，妹妮想拖埋一份佢地會fing開佢隻手唔肯拖。我都想了解下妹妮係班入面既人際關係，因為好似無咩朋友咁既。但係聽佢講平時都有幾個顧定既朋友一齊玩既，佢地分晒幾個一group，有時就呢個同呢個玩，有時就呢個同果個玩咁。。。可能比大人更複雜呀



上到巴士同朋友仔bye bye喎，哈哈！



係車上都有個抽獎問答遊戲，妹妮係第二個最後先被抽中，因為就落車要答得快，點知妹妮又扭扭泥泥唔出聲，本來要答3個答案，老師見佢答一個都比佢過關！



第日咁見小一，真係等攪六合彩派位都得嘞！比佢激死



入到樂園都係自由活動先，11：00再集合睇show，見到小紅貓又無人排隊影相即時影幾張先啦



呢邊係兒童樂園，我地以前都無行過黎呢邊架



一陣會去睇‘天上皇者’雀仔show，所以老師帶晒我地去集合地點先，再解散玩一陣，去下厠所咁。妹妮本來拖住後面兩個同學仔架，點知呢個同學仔甩開妹妮隻手，初初妹妮甩開再無人再拖住佢架（見到既時候又唔可以閙個細路）後來甩開妹妮手呢個同學仔又拖番妹妮噃。其實唔知妹妮被人甩開手時有無唔開心既呢？佢個樣又無點表現出來



跟住呢個同學仔拖住妹妮，仲話：我地兩個結婚啦！ （咁快？）我地兩個家長都係度哈哈笑



講好幾點再集合後就散開晒玩一陣

趁未夠鐘我地去玩下小火車



不過就無入到兒童樂園入面，驚入左去拉唔番佢出黎呀！



入到去劇場睇show，妹妮都係孖住媽me。個show我地以前都未睇過，其實都唔知有呢個show，有好多大雀都有出場。最特別係貓頭鷹，好大隻，成隻大肥（屋企隻貓）咁大隻架！



仲有鷹同鸚鵡同埋其他品種架，大概十零分鐘就完場



我地又有兩個鐘自由活動，本來諗住同妹妮坐熱氣球，點知又係等成個鐘！因為舊年農曆年初三逼爆ocean park黎果陣，我地排左成個鐘隊佢先話因風向唔隱要暫停，等多半個鐘先知會唔會再開。果次妹妮真係慘，咩都玩唔到就返屋企喇。今次都玩唔到，買隻熱狗佢食下先。



本來想去搭吊車，去緊吊車站中途見有個迴轉木馬，妹妮就扯左去玩！



望出去有條懷舊街我地都未去過噃



呢個唔用木馬用海洋生物，都幾有創意，而且仲做得幾靚潻！



玩完一次見無咩人排隊即刻再玩多次



點知妹妮仲未厭要再玩！



總共玩左成3次呀！！



仲有時間就走去水族館參觀下，有妹妮最鐘意睇既魚魚



仲有得摸摸海星潻！



媽me都有摸呀，因為妹妮猛叫我都摸下啦，原來好硬架！



妹妮話最想睇大魚，鯊魚，魔鬼魚，終於見到喇！




行完水族館出口係賣紀念品，妹妮即時執起隻毛公仔話想買左佢，好彩叫佢放低再去另一間睇下先啦，佢又好順攤，仲唔記得晒潻！



12點左右，想去食野，點知餐廳都逼爆，要等廿張飛！唯有排隊去小食亭外賣再搵位坐啦，好彩求先妹妮自己先食左隻熱狗咋！今日真係比天氣玩死，尋日仲毛毛雨，仲諗住今日又凍又濕，點知又熱又晒！一入樂園已經幫妹妮除左件半毛底衫，中午太晒，見有把遮索性開黎用。妹妮遇到同學仔，於是我地坐埋一齊食埋晏潻！



妹妮話平時都有同Gianna一齊玩架。



因為吊車太多人，我地要趕點半前到對面岸再集合上堂呀，唯有搭海洋例車



去到harbor pier, 應該係一個learning center，家長要係出面等一個鐘，小朋友全部入去由海洋公園職員講解海洋生物。



集合喇！我地去水族館時都見到入面有另一隊同學仔好似鴨仔一樣，每人手拉住一條兩邊都有手挽既長帶，兩邊各企十個同學仔，由公園職員帶住行。唔知妹妮入去呢個中心係咪都拎住呢D鴨仔繩行呢？




等緊齊人之際妹妮突然用左手包住右手D手指，叫同學仔估邊隻係中指。呢個遊戲係Evan叔叔教架。妹妮仲叫同學仔：估下啦，估錯都唔駛驚架！



有時問佢問題成日都唔敢答，我地就係講呢句架喇！點知呢個遊戲又好似幾受歡迎噃



好喇，bye bye家長，細路仔同老師全部入晒呢個中心，我同另外兩個家長本來見大家平時都無機會玩新起好既機動遊戲。我地想玩水果個熱帶激流，但係幾個人又一邊傾偈一邊行，又行錯路，兜錯路，去到排隊都就快要接番D細路，最後都無玩到呀。



正式放學了，而家開始可以除時走人，放學時約好晒其他同學仔去睇海洋劇場，但係我地去買D野食先，點知已經搵唔番D同學仔了，太多人喇！



仲開始西斜晒到‘興’晒！要拎留頂帽出黎先得。



仲有成半個鐘先開場，好彩有D樂隊表演無咁悶咋！



開場喇，其實妹妮都睇過呢D海豚表演幾次了，不過每次都好似好新鮮咁



妹妮啱啱上完堂，學識分海獅同海狗（sea lion 同seal)。佢話鐘意左邊隻女仔海狗喎。




睇完表演又同同學仔失散晒，本來諗住帶佢去玩埋摩天輪就返歸了。橫掂放左學，同妹妮換埋衫，初初佢心急到拉我呢埋一邊就話換衫，但係行埋一邊後又話驚比朋友仔見到，於是我地去左厠所換衫。排隊時見番同學仔，於是又一齊玩！



Nicole都係細B，仲細妹妮兩個月呀，所以妹妮差D可以抱起佢！



呢個摩天輪，我地都未玩過呀



妹妮同Nicole好似玩得幾開心



見吊車開始小人排隊，搭番過去啦！排隊時仲有姐姐扭波波潻呀




呢幅相同上面banner果張係咪唔同左好多呢？我覺得佢長頭髮老積好多咁呀，都係冬菇頭可愛D細個D




落吊車，我地一齊買了呢幅相，影得我地四個都幾靚呀

離開吊車站必經木馬，又坐多一次！



見佢咁心，唔緊要啦！


跟住我地去左兒童樂園玩，每次6人跳5分鐘，但係因為有工人等清潔，跳左兩分鐘就出番黎喇。妹妮話D小朋友唔同佢玩喎，梗係啦，你換左衫無著校服吖嘛,佢地全部著晒校服咪以為你係街外人囉！



於是去玩跳樓機，排隊時佢望住人玩都無話驚，應該OK既，你睇仲笑得咁開心！



好彩無驚，只係大叫啫！問佢驚唔驚，佢話唔驚喎，淨係‘吖，吖’咁之嘛



之後又遇番nicole一齊玩



最後玩埋呢個真係要走人了，成7點喇！仲未食晚飯呀



但係兩個都話唔肚餓！有得玩可以唔駛食架。



妹妮話要同個氣球影下相，坐唔到都影下呱？



呢張妹妮揸機既！跟住我地同Nicole一齊搭的士返屋企，今日真係攰過返工，由朝8：30玩到7：30，行足全日，雙腳都攰到爆呀！叫爸B下次一齊再去，佢都話咪搞！



今次精喇, 拍低妹妮第一次玩跳樓機既video