本來星期五係妹妮學校大旅行，連同其他年級一齊去大浪灣玩水水，仲每個小朋友可以帶兩個家長一齊。不過星期四落大雨，天文台又話星期五都會落雨，校方星期四四點幾就打黎話會取消旅行，我隨即問幾時會補番，佢地話要６月先！！！吓？五月都未到，點解唔可以改下星期啫？
最慘係返到屋企話比yayaGigi知呢個消息，佢話晏晝仲同妹妮講左聽日去beach，仲一齊執好晒去沙灘D用品潻。
都不知幾興𡚒，不過天文台話落雨都無計啦！點知第朝起身都不知幾好天，行行媽咪仲話佢地都無人通知旅行取消了，同爸爸一齊返左學校潻。
無旅行去，大家都好失望，其實除左小朋友，家長都好期待同自己子女一齊去下旅行架！！上個月個旅行已經因為沙塵暴取消了，今次又話落雨，個天真係大整盅！！最抵死係星期五陽光普照囉！激死人！！！
星期六朝唯有帶妹妮去公園玩下囉
呢身騎呢配搭都係妹妮自己揀架，因為佢係要著件紅色背心，仲話要show D圖案出來，唯有著係件tee上面囉。叫仲著對波鞋，佢居然話係for school only。再拎對布鞋仔，又話for playroom only。咁邊對先去街架，佢話要purple boots，即係對UGG毛毛boots，想焗臭腳咩？最後揀左呢對啡靴著。
跟住去食早餐，通常叫通粉或牛腩河都可以食到成碗粉仔呀！
夜晚同舅父德德與祝生日，去食buffet，自從帶妹妮食過tea buffet後，發現妹妮食buffet既小宇宙，就覺得帶佢黎就勁抵，因為次次都由頭食到尾！今日都無餵妹妮食晚餐，索性等佢去到餐廳食過夠。
成幾個星期無見公公，ＥＥ，姨丈同舅父，今日又懶怕醜，一黎到就要hiding，閃閃縮縮又呢埋係爸Ｂ度，又呢去我度，又要遮住雙眼-_-"
不過有野食又唔會客氣落手食囉。
你睇食得幾開心！
例牌大合照
可能公公見得多Ｄ，望住公公時會無咁怕醜，仲肯叫人，但一望住舅父又扭頭扭髻，又要望又要驚。
呢個姨丈成日整盅妹妮，不過反而令妹妮無咁怕醜，仲成日撩佢玩。
其實玩一陣就一Ｄ隔膜都無了。
仲表演扮野潻，咪又扮daisy duck呀，mickey mouse同hanny manny囉。
突然同姨丈friend過打band潻，走去懶嗲咁攬住人地。
又拍拍手
食左成３個鐘，係時候要返歸覺豬豬了。坐左成晚要伸番過懶腰先得。
因為一直困住係ＢＢ櫈無落地，臨走時先見到個朱古力噴泉，說時遲那時快已經隊左隻手指埋去！！
爸Ｂ即刻叫妹妮隊隻指入口食左Ｄ朱古力，點知仲篤到成臉係！！臨走先搞到污漕邋遢，快Ｄ返屋企覺豬喇！
No comments:
Post a Comment