東京箱根之旅2012 ﹣ Day 2 三鷹博物館

1月29日 晴，呢幾日天氣都算唔錯，因為聽聞之前幾日都幾凍架，但係呢幾日尚算OK，大約幾度，無雨無雪。我同爸B都係一件heat tech底衫加一件面衫搭件羽絨個身都夠暖了，係行到橫街太陽照唔到時就有D寒，最緊要帶頸巾。妹妮就當然包糉一樣又羊毛底又冷衫打底啦



第一站去讚岐烏冬，今日我地帶左B車，因為行程比較遠，萬一妹妮攰或者眼瞓都可以係車上覺豬。如果無帶叫爸B抱抱真係唔知點算！



呢度D烏冬又真係幾好食，加埋溫泉蛋真係好正



係街頭影張相先



妹妮而家大個好多，可以叫佢幫手買車飛了，叫佢㩒價錢，人數再投入硬幣



好快就有車飛了，日本既好處係6歲以下好多時都係免費既！所以我地仲有兩年enjoy呢D優惠咋



臨上車前去買D小食以備不時之需



今日節目係去睇宮崎駿個博物館, 舊年黎到去lawson買飛日日都沽清, 於是今年一早係香港買定, 貴小小但係起碼有飛買, 一定入到場吖!



去到三鷹站見到有無印kiosk, 估唔到除左機場有, 連車站都有!



出站後就去搭貓巴士, 等車期間好大風, 好彩一陣就有車到!



呢架就係貓巴士了!! 車身既貼紙都好靚架



一落車就係博物館門口喇





入到館內就唔準影相, bb車要泊去"停車場", 我地睇左一套短短地既電影, 跟住去玩貓巴士, 只係準十二歲以下玩架咋. 見到隻大貓巴士, 大人都想爬上去玩呀! d細路分6-7個咁入去玩, 每段玩大約5分鐘. 入去前個管理員同果組細路講解一輪, 當然妹妮聽唔明. 入場時, d細路好似放狗一様衝入去玩. 我見妹妮自得其樂又爬上爬落, 又碌入架巴士入面, 都好開心架, 入面仲成地都係煤炭屎鬼潻. 忍唔住偷影左張相呀. 雖然d細路好開心, 不過管理員一叫, 就個個都乖乖咁自動出黎著鞋.



玩完室內出室外玩, 原來無野玩, 只係觀光架咋. 呢個機械人係好多有關呢個博物館既網頁都見過, 算係地標了.



呢個樓梯就係上去平台同機械人影相既通道了



整座建築物都鋪滿植物, 幾靚呀, 有d外國feel



入面當然小不了有紀念品賣, 妹妮揀左一手幾隻細細隻既公仔, 爸b篩選剩貓巴士同波兒咋



開隻蕉食下先, 就係一早係車站買果盒了



d本地小朋友都係自傭食物, 佢地食飯團同腸仔



睇得8899, 我地去一站, 就係附近既吉祥寺. 妹妮玩左一朝可能都攰, 見到龍貓都話唔去影相了.



索性坐係車算, 呢排仲興冚低埋個篷



沿住馬路行十分鐘左右就到吉祥寺了, 我同爸b好多年前都黎過, 不過就唔算印象深刻, 所以只黎過一次咋.



搵晏食, 入左間食豬扒飯既, 點知豬扒都賣晒, 得呢個豚肉飯係豬


另加個雞親子飯(即雞同雞蛋)



行入步行街, 好似以前黎都唔見有步行街既, d蔬菜好大棵呀. 呢度周圍都係小店, 有心機逐間行可能會尋到寶既.



離開吉祥寺, 爸b本來想帶妹妮去淺草寺架, 不過去到上野轉車都成4點了, 費事去到都天黑. 於是就留係上野行下, 順便睇下動物園有無開. 點知同舊年一樣, 唔記得今日係星期日, 又關門了.



以前頭幾次黎東京, 都住係上野d民宿架, 係近幾年先識住新宿, 所以上野都留低左唔小我地既腳毛架. 又去上野アメ横行街. 呢度出名買手信, 但係我地一d手信都無買呀. 除左手信仲有好多街頭小食, 呢d明明係油炸鬼卻叫上海名物, 我覺得如果係度開間煲仔飯都有得做架!




d 拖羅都好底, 可惜我地仲未返香港, 買唔到吖



妹妮都係繼續唞, 唔知點解佢今日瞓左好多呀, 自從晏晝上b車就斷斷續續咁瞓, 正一懶豬



不過我地行左一條街佢就起身, 見到波子機鋪有隻熊貓, 佢仲主動走埋拍熊貓, 又攬實人. 本來隻熊貓都係行行企企, 突然有個人咁熱情走埋黎好似久違了既朋友咁, 唔知會唔會好開心呢？



本來想係上野食飯, 但係都係返左新宿食



一出新宿站就係我既偶像木村呀, 真係睇咁多年都無變架!



兩父女又急步去搵食喇

今次去同事推介既燒肉店，本來都有考慮過再去六歌仙，但係每位成萬幾円，收費實在太貴了。呢間叫DON DON, 有同事力推加上有酒店既coupon, 有9折架。

初初入到鋪頭見到長吧枱，仲以為入錯鋪， 但係明明係叫Don Don架，原來係你坐低先拎個炭爐埋黎！都幾有風味噃

燒野食呢D粗重功夫爸B實爭住做啦！

其實我地都唔算好大食，食六歌仙真係會蝕＄。我地散叫都係叫左3﹣4碟牛咋，不過的確幾好味

呢碟和牛要1500円，反而覺得太漏，900円一碟既牛頸瘠仲有肉味又好淋。

合照，點知都影唔到個火爐既！

我地坐近門口，妹妮捉住度門隻角黎玩！

回眸一笑

其實仲係一隻大BB黎架，好彩而家佢都肯𡁻下野食，D牛肉妹妮都九食架。今次埋單加埋有折都係7000円度咋！！可以食幾次六歌仙呀。

最鐘意嗲住爸B，成日講住‘我好鐘意你架！’  冧到爸B暈，今日係咁先，再續。