講。返學

今日 (1月4日)係妹妮返學兩週年, 兩年前今日第一次返Nursery, 頭兩個星期都好似以前playgroup一樣有yayaGigi陪上堂，後來先自己搭車。仲記得yaya第一日唔駛跟班，同我地一齊送妹妮上車返學後，同我講話有D唔捨得妹妮離開佢，一個人係屋企熨熨下衫都想喊咁話，因為以後妹妮大個女自己返學，唔駛再日日跟住佢。不經不覺就兩年了

眨下眼已經大隻雷雷！今年學校相，雖然笑容就硬左D，不過都收貨啦。

而家每日放學都有朋友仔一齊去樓下個playroom玩。妹妮一歲大就開始係度蒲，而家已經識左好多朋友仔了。基本上妹妮已經係我地條村出左名，個個管理員都識佢！有次我搭𨋢見到有個小朋友同妹妮同一學校，同佢媽咪講我個女都讀呢間架，個媽咪居然話 ： 我知Aerin吖嘛，我地識佢架 （吓？？𢱑晒頭呀！）

又有一次同妹妮一齊入𨋢，有個男人見到妹妮就問佢係咪成日係電視見到佢果個女仔？ 我話佢無上過電視噃

男人話：youtube 先真

我話；應該唔係呱，妹妮都唔出名既

返屋企同yaya講開先知原來個男人係妹妮個大姐姐朋友個爸爸呀！佢地住樓上，個姐姐又成日睇妹妮D video，所以佢咪成日係電視見到妹妮囉

大個左，依舊古靈精怪。

有次我夜放工，返到屋企佢已瞓覺了，於是便打電話比妹妮傾下偈。電話中佢話自己已經瞓左上床，我話我知道吖，我係電視度睇到你架（並唔係裝左CCTV，不過細個時老師都係咁同我講架，當時仲信係真，以為曳就會被老師見到）。

妹妮居然話 ：好似jesus christ咁呀？（即係曳既話耶穌會知一樣）
我唯有答：係呀
妹妮話：媽咪係office都有電視架？我地屋企都有電視架 （梗係啦，唔係我點從電視見到你呀？）

上K2後, 學寫左好多字, K1時D功課都係畫下線, 連下線咁. 上到K2每日都有寫字功課, 日日都有中文, 有英文同埋畫下畫填下色...數數下都有成三份功課架. 不過好彩每份都係十個英文字,十個中文字, 妹妮又唔抗拒做功課啫. 而家爸B教佢寫個劉字, 咁多筆劃都唔知佢下次仲記唔記得?  有老師講過妹妮雖然好醒目,又可以用詞表達到自己. 但係好易被distract, 分心, 可能係發白日夢. 有咩方法可以培養小朋友專注力呢? 真係頭痛!

出年妹妮K3了，又係時候要擔心佢讀咩小學，希望妹妮可以入到間好學校啦！亞門！