盛夏の北海道 - DAY５。美瑛，富良野

一早起身我地去大廳食早餐，如果尋晚無book 入房食既in room dinner，都係出黎呢度食架，不過我覺得入房食自在Ｄ，同埋去溫泉酒店硬係要咁至夠嘆嘛！最衰早餐無得揀，焗住去大廳食囉，不過呢個廳環境都一流呀，對住Ｄ樹咁靚！

妹妮每朝起身都特別扭計同痴身，平時有yayaGigi係屋企又唔見係咁，擺明hup我同爸Ｂ啦！！！

食過早餐，我地先有機會周圍行下，因為尋晚又落雨我地成晚都匿係室內。記得揀呢間酒店原因之一除左係因為有房（因為呢個星期富良野Ｄ酒店好爆呀）之外，仲因為佢有個男女混浴既溫泉，淨係夏天先開放架，我地諗住可以一家三口一齊浸吖嘛。於是出去睇下咩環境。我地一出到去求先飯堂望出去個樹林，已經聽到瀑布聲，於是沿住小路去。嘩條小路係條落斜既山路，而且好長下噃！妹妮肯行落去都一定要抱番出黎，於是都係我一個人落去裝下算了。

落到去見到間屋，原來個混浴溫泉被擋住晒架，想偷窺都唔得架。於是入去睇下，兩度門一隻男，一隻女，一開門入去就已經係個石頭砌既溫泉，無更衣室架，不過一個人都無。如果唔係咁遠，真係想叫埋妹妮佢地一齊落黎浸下呀。

我地都係影下相算了，返去浸番男女分開個Ｄ算啦。浸完一陣都夠鐘check out，呢度Ｄ酒店間間都１０點check out，個溫泉9點就close，等你地返房執行李。我地今日行程都算緊密架，因為今日一日要行晒美瑛同富良野Ｄ景點，晚黑要返去扎榥了。

因為白金溫泉比較近美瑛站，第一站去左Zerubu之丘同阿斗夢之丘。

我地第一次睇呢Ｄ花田，覺得好靚呀！！今日好彩無雨，不過又唔算好天，有灰雲，無咩太陽，其實唔落雨已經好好了。

我地影完招牌相就周圍行下，跟住爸Ｂ同妹妮仲除埋鞋係草地上走左一陣。

仲追住我話要咬我潻。

個斜坡雖然無花，不過好大，影相都靚架。

有飛機經過呀，可惜個天色咁灰，如果係藍天幅相就靚喇。

跟住又做爸Ｂ既model，你睇，擺晒甫士架。

不過近睇就難頂Ｄ囉

都唔知係邊度學埋Ｄ咁既表情？又識㩒住頂帽。。。

之後我地去睇左附近拼布之路幾棵名木，我地無行晒咁多棵樹呀。淨係睇左ken & mary 之樹同後面呢棵親子樹就算喇

爸Ｂ問跟住仲有Ｄ咩地方去呀？我話都係睇花囉，成日都係會去下Ｄ花田參觀，都係睇Ｄ咁上下既野架。

下一站諗住去Ｄ有野食既地方，於是去左千代田牧場，呢度有動物睇下同埋有扒食。不過一黎到見個牧場好空曠，無咩人，只有一個個範圍好大既圍欄，每個入面有唔同既動物，又唔駛入場費噃。

見到呢３隻朱儒馬，即時幫佢改名做爹Ｄhorse，媽me horse 同Aerin horse。。。所有有３件，大，中，細size既野，妹妮都會叫佢地做爹Ｄ，媽me同Aerin架。

呢度仲有自助買賣機１００円一包草粒餵動物架。

除左有馬，有羊，仲有Ｄ家禽好似鷄，孔雀，免仔等。又綁左隻小山羊比人影相，妹妮猛走去摸佢，但隻羊又唔係好受落咁，成日想用對角頂妹妮，於是佢兩個好似玩追逐遊戲一樣你追我我追你。妹妮仲一路走一路話‘好驚驚呀’，但係又一味走埋去要繼續摸隻羊！到而家問番佢咩野用隻角想追住你呀？佢仲答得出係goat架。

呢隻都係侏儒馬，可以比650円就騎住佢繞場一週喇。妹妮唔敢騎馬，但係又夠膽走埋去摸下

跟住去牧場入面間餐廳，好似牧場餐廳Ｄ扒必定好食的。我地叫左個貴Ｄ（三千幾円）既美瑛牛扒同一個正常set。我個正常set 有牛扒同漢堡扒，我地又顏砰塊漢堡扒撈白飯比妹妮食。出動埋本故仔書，講故佬講故，妹妮又食晒成碗飯喇！

食完晏又有另一個景點，其實每個景點之間都係十幾公里車程，好近咋。不過妹妮一上車無耐就瞓著覺豬了。我地下一站就係四季彩之丘，但係妹妮又啱啱先瞓著覺，我地無夾硬抱起佢呀，我自己入去參觀下，爸Ｂ就陪妹妮係車到等一陣。其實個個ＸＸ之丘都大同小異，都係好多花排得靚靚的。我淨係影左幾幅相就算了，呢度都有Ｄ收費農夫觀光車比遊人坐架。呢個就係呢個丘既標誌呀！

我搵個日本阿叔幫我影相，點知個阿叔居然影到個公仔比我遮住左！！真係超低能呀！！

由於妹妮仲未醒，我地改去下個景點。。。日之出公園！去到時妹妮仲未醒，今次輪到爸Ｂ落車‘先睹為快’。爸Ｂ勁呀，影到好多相呢！

佢話個公園好靚，值得帶妹妮去睇下，於是我地就等一陣希望妹妮瞓醒，不過正準備起程去下一個景點時。。。

好彩隻豬仔就醒左，我地即時兜番轉頭去公園，不過妹妮剛瞓醒奉旨要抱，又係爸Ｂ發揮父愛既時候了。

上到頂先有呢塊招牌影相架。

除左我地仲有香港人係薰衣草田度影婚紗相呀

呢個就係地標喇！本來睇旅遊書覺得個公園無咩特別，都係順路先去，點知又真係幾靚噃！

之後就去名勝地點富田農場，呢度好多遊客呀，我地食個薰衣草雪糕。本來諗住只係一陣薰衣草味，點知食落又好清新，好味喎！

又係妹妮solo時候

今次豎手指

全家幅

呢度影相的確幾靚既！

你睇妹妮既丁字腳甫士！

Ｄ草田真係有陣陣薰衣草味架。

富田農場隔離有個食蜜瓜同雪糕既地方，不過爸Ｂ又唔好Ｄ蜜瓜，又食完雪糕無耐所以我地去食晚飯算了。附近仲有幾個景點，不過我地都無去了，５點幾了，去醫肚算了。

　經過彩白之里入口都無去了，呢度就係北星山，可以搭吊車上山，不過好似過而家唔比抱住細路坐，我地就影幅相算了。

plan 左去福壽司，車程成半個鐘架，點知去到居然關鋪！！我上網查過明明係星期一休息嘛，點解星期二又休架！我地吊在半路中途，就改去對面間yamadori食燒肉算了。。。不經不覺我地今個trip 食肉／扒多過食魚生壽司呀！

已經食左幾餐扒，今餐諗好晒食壽司，點知又食返燒肉好彩就係呢度係和式坐位，妹妮又可以行來行去

嘩！！碟牛肉好多雪花呀！燒好後仲好正呀！！！直程有Ｄ拖羅入口既感覺呀，我地encore左兩碟呀！

連妹妮都有食呢Ｄ牛肉呀，我地剪到碎晒撈埋飯，妹妮食晒成碗飯！估唔到錯有錯著，呢度Ｄ牛既質數咁高，仲平過牛角潻。

食飽飽我地返扎榥了，回程原來又係行番黎既時候個條山路，同我初初想像中好似美國Ｄhighway，一條大直路，兩邊係田相差好遠呀。我諗去富良野係無一條直路highway呱？返到之前住間酒店都成十點幾了，不過妹妮居然一Ｄ都未眼瞓，只係上床碌來碌去咋！

因為時間關係，我地其實spend左日半喺富良野咋。有好多景點都無去到，下次再有機會既話，會book多一晚溫泉酒店，有兩個full day，應該就無咁趕了。雖然時間上都有控制之內，但係就幾緊湊，期待再有機會重臨富良野呀！